Revenda Kurd li Berlîn rêkxistinên xwe nû dike Armanc Agîd Nerweyî – Berlîn

Îro 27 Eylûlê li navenda kurdî li Berlîn hejmareke ji Revenda Kurd û Endamên Saziya Sozkê kombûna xwe a salane saz kirin û hilbijartinên giştî jî encam dan. di destpêka civînê de Serokê Desteya Giştî a saziyê liser kar û xebat û pêwîstiya xizmeta Revenda Kurd axaftin kir û da diyar kirin ku saziya wan di deh salên damezrandina wê de kariye xizmeteke baş bike û pireyekî navbera Kurd û Almanan de dirust bike.

Piştre raporên desteya kevin hatin xwendin behsa çalakî û wan xizmeta hate kirin. Liser xalên destorî yên yasaya komele û saziyên civakî a Almaniyayê. Bi hilbijartin desteyeke nû hat hilbijartin ji 7 kesan bo du salan. Zana Şîno weke serokê nû yê saziya Sozk bi piraniya dengan hat hilbijartin.

Şîno ji BasNews re behsa karnameya xwe a nû bo 2 salan kir û got: “Me karnameyek heye ew jî vedigerw jibo hatina hejmareke zêde a penaberan. Em dê zêde giringiyê bi birêvebirin û xizmetkirina penaberan bi din. Xizmetên ku em bo penaberan dikin pêk tên ji vekirina kursên ziman, alîkariyên taybet bo malbat û vedîtina cî û pêwîstiyan bo zarokan û delîveyên xwendinê.”

Serokê nû ê Saziya Sozkê da xuyakirin ku ewê ekîbeke genc û hizreke gencane bikevin xizmeta revenda xwe û têkeliyên xwe wê ligel saziyên Kurdî û Almanî bi hêztir bikin. Desteya nû a saziya Sozk ji van kesan pêk tê: Zana Şîno, Armanc Agîd Nêrweyî, Telar Gulanî, Hanî Şakir, Hemîd Mecîd, Bapîr Akreyî û Faten Xaneqînî.

Hêjayî gotinê ye li Berlîn 26 komele û saziyê kurdî hene ji wan jî 4 bi fermî ji Senat a ( Hikûmeta Herêma Berlîn ) alîkariyan digirin jibo çalakiyên xwe, ewên din liser abone û dahatên taybet kar dikin, li Almanya bigiştî 123 Komele û sazîyên kurdî hene.