Ger Hemî kesk Be, Hemî Bêdeng Be/Tengezar Marînî
Dûrahî, nêzîkî qeraxa xewnên wê,
ne carekê ba dihingivt tevzînokên sermemikên wê.
Keştiyek ji mijê,
destekî ji hilma sibehê ber bi bînahiya çavên min ve.
Lerze bi moranê nuxumandî,
ji nav dûkêla çirûskê xwe berda geliyekî kûr,
ne serî û ne binî.
Demê dest pê kir, berev bi sehrbaziyê ve çû..
Ba li wir sîtaveke tarî bû
Ji bakur ve, êşek şêliya,
difin bilind û ehmeq.
Di ser Feratê re, neynik…
Li wan qeraxan, kevizê û tîran berev mirinê ve ez birim.
Dem pîrhevok e,
dawî lê nayê..bûnewerên tarî.
Li pişt wan asoyan, dengek heye..
dûr e, dûr e..
Ji evrazn tu dihatî.
Ez destkurt im
Li wir masiyek hebû, Firnikên wî bêlome bê
Dergehê ber bi jêrzemîn ve.
Şev û roja,
tîrên Merdox, nema êdî têperî gewdê Iştarê dibû
Kî li wir zêrevan e?
Di nav Afsaniyên dapîra min de jî, çîroka Dêwê heft Serî hebî
Li wir,
dem dixwaze bilive
her tişt diweste
agah li mêrantiya we hebî
ji her tiştî westiya me
di bêdengiyê de dixeniqim
Li wir çêra jehra Hydra,
ew marê 9 serî yê jehrawî dihate kirin.
Li derveyî demê bû ew efsane, li nav derya û oqiyanosên dûr bûn
Li wir, dîwarê qalind ji mijê hebûn.. Ez siwarî wan dihatim
Lehenga wan diyardeyan, ji bilî reşbeleka min kî hebû?
Li nav qada Poseidon bi tenahiya me re reftarek kir
Di navbera dema min û te de
Heft roj in, ên roniyê didin.
Ji baranê, ji zivistanê, ji wan kolanan hez dikim
Ji wê avê, ji wê qehwê..ji wî gelî
Ji kêfa zarokan
Ev dilê befirgirtî
dikare hemî mûman bişewitîne
Poseidon: Xwedawendê deryayê, birayê Zeus e, yek ji wan 12 xwedawendên Olomp e.
Leave A Comment