Li Hewlêrê rojane herî kêm 10 kes plazmaya xwînê dibexşînin

K24 – Hewlêr

Serperiştyarê Banka Xwînê ya Hewlêrê ragihand; piştî cejnê û zêdebûna hejmara pêketiyên koronayê (Covid-19), her roj herî kêm 10 kesên başbûyî, plazmaya xwînê dibexşînin.

Dr. Huner Umer, Serperiştyarê Banka Xwînê ya Hewlêrê ji K24ê re ragihand: “Piştî cejnê û bangewaziya Wezareta Tendirustiyê bo bexşîna plazmaya xwînê, heta niha 67 kes bi mebesta dayîna plazmayê hatin Banka Xwînê, ji wê hejmarê tenê 32 kes dikaribûn plazmayê bidin. Ewên din hatin redkirin, ji ber ku piraniya wan, hêj di xwîna wan de dije-ten çênebûbû.”

Serperiştyarê Banka Xwînê ya Hewlêrê eşkere kir: “Hemû wan kesên ku nexweşiya Covid-19 derbas kirine nikarin plazmaya xwînê bibexşînin, ji ber ku çend fîlter hene, fîltera herî dawî dije-ten e, nîvê wan kesan jî, ji wê fîlterê dernakevin.”

Dr. Huner Umer destnîşan kir: “Di van rojên dawî de rojane zêdetirî 10 kesên başbûyî ji bo dayîna plazmaya xwînê, serdana Banka Xwînê dikin.”

Umer bal kişande ser wê yekê ku plazmaya her kesekî başbûyî, ew dikarin ji bo sê nexweşan bi kar bînin.

Serperiştyarê Banka Xwînê ji welatiyên li Hewlêrê daxwaz kir; kesên ji nexweşiya koronayê rizgar bûne û niha tendirustiya wan baş e, serdana Banka Xwînê bikin, da ku plazmaya xwîna xwe bidin û nexweşên din, ji mirinê rizgar bikin.

Î.A