Misir û Yûnanistan astengekê datînin ber Tirkiyê

Misir û Yûnanistan piştî hewldanên sê salan, ji bo diyarkirina sînorê deryayî yê navbera her du welatan, rêkeftinek li ser bingeha yasayên navdewletî îmze kirin, bi vê rêkeftinê, van her du welatan astengeke mezin danîn ber berjewendiyên Tirkiyê.

Li gor zanyariyan, li nava Deryaya Spî 345 trilyon sêca yedega gazê heye, tevî 3.4 milyar bermîl yedega petrolê, ev serwet bûye sedema cihê milmilaniya welatên derdora Deryaya Spî.

Ji vê rêkeftinê, sê armancên Misir û Yûnanistanê hene; rawestandina çavlêbirîna Tirkiyê li serweta Deryaya Spî, bi azadî lêgerîna petrol û gazê li sînorên welatê xwe û astengkirina rêkeftina navbera Erdogan û Serac.

Misir û Yûnanistan roja pêncşemê 6ê Tebaxa 2020an, derbarê diyarkirina sînorê deryayî yê her du welatan de rêkeftinek îmze kirin, ku deverên avî yên aborî yên her du aliyan li Deryaya Spî, li xwe digre.

Samî’ Şukrî, Wezîrê Derve yê Misirê derbarê rêkeftinê de ragihand: “Ev di navbera Qahîre û Atînayê de qonaxeke nû û giring e.”

Nikos Dendias, Wezîrê Derve yê Yûnanistanê jî diyar kir: “Ev rêkeftin, berevajî rêkeftina navbera Tirkiye û Serac, li gor yasayên navdewletî ye.”

Rojhilatê Deryaya Spî, bi taybetî ew beşa ku bi çavkaniyên sirûştî dewlemend e, bûye devera nakokî û çendîn welatan rêkeftin kirine da ku rê li ber berjewendiyên Tirkiyê bigrin.

Li gor Neteweyên Yekbûyî, sînorê avî yê her welatek, heta 12 mîl qeraxa bejahiyên wî ye, lê devera aborî zêdetirî 200 mîl li xwe digre. Ji ber têkelbûna sînoran jî, welatên derdora deryayê, ji bo diyarkirina sînor û deverên aborî yên xwe, rêkeftin pêk tînin, Misir û Yûnanistan jî, li ser vê bingehê rêkeftinek îmze kirin.

“Tirkiye rêkeftin nedîtiye, lê rexne dike”

Duh Wezareta Derve ya Tirkiyê ragihand; rêkeftina sînorê deryayî ya navbera Misir û Yûnanistanê, “her wekî tine” ye, ji ber vê yekê ti sînorekî avî di navbera Misir û Yûnanistanê de tine ye, Tirkiye ji aliyê meydanî ve û li ser maseya gotûbêjan, dê her li ser vê têgihiştinê tevbigere.

Di daxuyaniyê de hatiye eşkerekirin, Tirkiye dê di parastina mafên Tirkên Qibrisê û berjewendiyên xwe yên li rojhilatê Deryaya Spî de, berdewam be.

Ehmed Hafiz, Berdevkê Wezareta Derve yê Misirê derbarê daxuyaniya Wezareta Derve ya Tirkiyê de matmayîna xwe nîşan da û got: “Sosret e ku Tirkiye daxuyaniyeke bi vî rengî dide, wan rêkeftin nedîtiye û ew hûrgiliyên wê jî nizanin.”

Î.A