Li Ber Dergehê Xewnekê/Tengezar Marînî

Mîna xerîbekî derdên xwe binax dikim.
Tenêtiya xwe dilorînim
ji dêmên te xem dibarin.
li perava çîrokên min û te
bîranîn dinivin
çavên xwe bi xewê dişom.

Torikê min û te hilgirê:
rengê me,
pênivîsa me,
xewnên me,
têkçûnên me,
kesksora me,
şikestinên me,
berf û barana me,
tav û birûskên me,
çîvanokên me,
demên me,
mirinên me, ye.

Ê raxistî bi ser
biyavên êşê ez im!
hêdî hêdî bar dikim,
rojên xwe,
ba û baranên xwe,
xwêya xwe,
agirê hinavê xwe,
erd û asîmanên xwe,
derd û kulên xwe,
di nav razên van tiliyan de hilgirim.