STRANBÊJÊ RADYOYA YÊRÊVANÊ – FETOYÊ HODÎK

Ceza xwe li girtîgeha Rûsîyayê bajarê Saratovê tevî Cangîr Axa paşê ji li Sîbîrê derbaz dike. Di sala 1942an Fetoyê Hodîk dixweze ji girtîgehê bireve, lê li nava mêşe dixalife unda dibe û nêzikî 10 roja hema usa li mêşeyên Sîbîrê digere. Pê mêweyê mêşe roja xwe derbaz dike. Lê paşe dikebe destê xebatkarên girtîgehê. Fetoyê Hodîk dibêje esker ku unda bûye, ji refê xwe qetîyaye. Zabit hukum dike ku Fetoyê Hodîk bibine kelê, gava tesmîl nebe gerekî bê gullekirinê. Dema ku peya tevî esker diçe hepsê, li rêda gelekî aciz û tî dibe. Piştî çend sehetan, Fetoyê Hodîk ser çok rûdinê û eskerê bi çek sîlahkirî dide fehm kirinê ku qidûmî wî tune here. Wê demê esker dixwezê Fetoyê Hodîk gulle bike û tivinga xwe dide ber wî. Fetoyê Hodîk jî destê xwe qilozî ezmana dike û ancax dibêje: “Tawisî Melek tu bêyî hewara min”. Usa dibe ku pê fîşeka esker Fetoyê Hodîk nayê gullekirinê, lê dema ku tivingê ber ezmana dike, fîşek difire ezmana. Usa Fetoyê Hodîk sax dimîne. Eskerê ûris gelekî ecêbmayî dimîne û dibêje Fetoyê Hodîk: “Te usa çi gotin got ku ew fîşek te neketîye lê ezmana ketîye?”

Fetoyê Hodîk esker dide serwaxt kirinê ku gazî Xwedê kirîye. Û pey vê qewimandinêra esker av û nanê xwe dide Fetoyê Hodîk. Ew tevî hev rûdinên û hêsa dibin. Peyra, wextê diçine girtîgehê, eskerê ûris êdî tivingê li ser Fetoyê Hodîk nagire û ew wek 2 hevala rex hevdu diçine hepsê. Gerek bê gotinê ku Fetoyê Hodîk 2 cara dizewice. Cara yekem pêşîya girtina xwe dizewice. Kulfeta wî ya pêşin Porsora Şevav bûye. Ji Porsora Şevav kurek dibe. Navê kur Cindî bûye. Lê telebextra, piştî 14 rojan Porsora Şevav diçe ber rehma Xwedê û 2 mehên şûnde Fetoyê Hodîk tê girtinê. Kurê Fetoyê Hodîk Cindî ji alîyê meta xwe Cemê tê xweyî kirinê. Dema ku Fetoyê Hodîk ji girtîgehê aza dibe, kurê wî Cindî 15 salî bûye. Cindîyê Feto xortekî zana bûye, tevî berpirsîyarê beşa kurdî ya Radyoya Yêrêvanê salên 1981 – 1994an Ahmedê Gogê Ûsiv xwendîye. Di sala 1952an, pey azabûnê cara duda dizewice û tevî kulfeta xwe Zeytûna Etêr dibe xwedanê 8 kur û 4 keçan.

Nivîskarê bi nav û deng Eskerê Boyîk li pirtûka xwe ya ser nave “Bi kurtayî dîroka Êzdîyên Ermenîstanê” dinivîse ku Fetoyê Hodîk li dibistana gundên Şamîran û Kelekûtê (Komara Ermenîstanê) karê mamostetîyê kirîye. Di salên 1980î berpirsîyarê beşa kurdî ya Radyoya Yêrêvanê salên 1981 – 1994an Ahmedê Gogê teglîfî Fetoyê Hodîk li radyoyê dike. Li Radyoya Yêrêvanê Fetoyê Hodîk stranên wek “Filîtê Quto”, “Lo Xalo”, “Eman Eman”, “Eman Bejinziravê”, “Lê lê cane” û “Zozanê Elegezê” distirê.

Fetoyê Hodîk gelek serpêhatî, mesele, kilam û dîroka civaka xwe zanibû. Dengê Fetoyê Hodîk jî gelek cuda ye. Bi rastî jî pirr zelal e. Gerek bê gotinê ku li jîyana xweda Fetoyê Hodîk gelek çetinayî dît. Girtîgeha Sîbîrê ku Fetoyê Hodîk li wir hatibû girtinê jêra digotin “Kela mirîya”. Çimkî hemû kes nikaribû ji wê kelê sax derketa. Lê Fetoyê Hodîk 15 sala li wê girtîgehêda bû, sax û silamet hate nava koma xwe. Fetoyê Hodîk yek ji mere êşîrê bû. Ew di nava civakêda çawa camêrekî xweyî gotinên xwe, zane, maqûl û dengbêjekî hezkirî tê bîranînê. Heger siyaseta dewleta Sovîyêtê nînbûya, diqewimî ku Fetoyê Hodîk bibûya serokê serhildana gelê xwe û nave wî li dîroka gelda bi herfê zêrîn bihata nivîsarê. Fetoyê Hodîkê Evdo di sala 1985an li Ermenîstanê nehîya Êçmîyazînê li gundê Arşalûîsê diçe ser dilovanîya xwe. Di sala 2020an bi alîkarîya berpirsîyarê beşa kurdî ya Radyoya Yêrêvanê Tîtalê Keremê Seyad şeş kilamên Fetoyê Hodîk ji arşîva Radyoya Yêrêvanê hate dîtin û gelê me careke din dengê lawê xwe li Radyoyê bîst. Erê, îsal temam dibe 35 sal çawa Fetoyê Hodîk çûye Rehma Xwedê, lê dengê wî îsal dîsa li zindî bû. Bira Rehma Xwedê Fetoyê Hodîkê Evdo be. Ji bona hazirkirina evê gotarê ez spasîya xwe didimê kurên Fetoyê Hodîk Apê Sûrên, Apê Semend, Apê Zirbe û Apê Mûrad.