Peyvdarê Hevpeymaniya Navdewletî ya li dijî DAIŞê di derbarê paşeroja Hevpeymaniya Navdewletî li Iraqê de, radigihîne: “Ne tenê Amerîka di Hevpeymaniya Navdewletî de ye, belkû çendîn welatên din jî tê de ne û li Iraqê jî dimînin.

Peyvdarê Hevpeyamniya Navdewletî ya li dijî DAIŞê Myles Caggins ji K24ê re ragihand, yek ji armancên Hevpeymaniya Navdewletî, duristkirina hevahengî û hevkariya di nabera Pêşmerge û hêzên Iraqê de bû, ji bo rûbirûbûna paşmayên DAIŞê. Çendîn caran jî berpirsên Iraqî jî daxwaza wê hevahengiyê kirine.

Got jî: “Ji sala 2014an ve, binkeyên Hevepeymaniya Navdewletî li Hewlêrê û Bexdayê hebûn. Li Hewlêrê guftûgo û hevahengî bi Pêşmerge re dikir û li Bexdayê jî bi hêzên Iraqî re dikir. Pêşmerge û Dijeterora Iraqê bi hev re bendava Mûsilê kontrol kir. Çendîn operasyonên din jî di navbera Pêşemrge û hêzên Hikûmeta Federal de hebûn û xelk ji destê teroristên DAIŞê rizgar kirin. Hebûna vê awayê hevahengî û hevkariyê di navbera Pêşmerge û hêzên Iraqî de, yek ji armancên Hevpeymaniya Navdewletî ya li dijî DAIŞê bû. Hefteya bûrî jî me bihîst, berpirsên Iraqê bi aşkere gotin, ew dixwazin hevahengî di navbera Pêşmerge û hêzên Iraqî de hebe”.

Myles Caggins dibêje: “Hevpeymaniya Navdewletî li ser bang û daxwaza hikûmetê, li Iraqê dimîne û hevkariyê bi Pêşmerge, Zêrevanî, artêşa Iraqê û hemû hêzên ewlekariyê re dike, ji bo rûbirûbûn û jinavbirina DAIŞê bi yekcarî.”

Peyvdarê Hevpeymaniya Navdewletî diyar kir, li ser daxwaza Wezareta Pêşmerge û hêzên Iraqî, rahênan bi sedema metirsiya Koronayê hatin rawestandin. Niha ji bo destpêkirina rahênanê, ew di guftûgoyan de ne.

Li ser derketina hêzên Amerîkî ji Iraqê got: Hevpeymaniya Navdewletî ne tenê ya Amerîka ye, belkû çendîn welatên din jî tê de ne. Di rojên bûrî de jî li ser daxwaza hêzên Iraqî, 6 welatên endamên Hevpeymaniya Navdewletî piştevanî di operasyonên hêzên Iraqî li dijî DAIŞê de kirin.

S. B