چارەسەر ل هەولێرێ یە /سەردار هێتوتی

هەفت ساڵ ل سەر ڕاوەستانا خەلکی ل هەمبەر پێدانا مافێن خۆ دەرباس بوون، ل شوباتا 2014 ب بریارا سەروک وەزیرێن وی دەمی یێن عیراقێ، بودجێ کوردستانێ دهێتە برین، پشتی ڤێ بریارێ هەرێما کوردستانێ دکەڤیتە د ناڤا قەیراناندا، لێ دەما خاستی ئابووری خومالی بکەت زێدەتر کەفتە ل ژێر باندورا نەداریا دراڤی دا و ئەڤ باندور ب تمامی د دەما ئەنجامدانا ریفراندومێ دا زیق بوون. ڕاستە هەفت ساڵ بورین لێ هەر جار و ب دەست و دوعایان و هندەک جاران ژی ب واسیتە و خۆشرینکرنێ سەروک وەزیرێن عیراقێ هندەک دراڤ وەک خێر دایە هەرێمێ لێ پشکا هندێ نەکریە موچێ فەرمانبەران پێ بهێتە دان. د سەردەمێ کابینا نوو یا حکومەتا هەرێمێ دا، ئەڤ کابینە زێدەتر ژ هەر کابینان ب دەستێ نەداریێ دنالیت و هەر جار ژی بەغدا دکەتە هێجەت بو نەدانا مەهیانا فەرمانبەران، ئەڤە د دەمەکی دایە کو مەهـ ل ڤی وەڵاتی بونە شێست ڕۆژ. حکومەت هێشتا یا ل ژڤانێ پارێ بەغدا، بێی کو بزانیت چارەسەر نە ل پایتەختێ فیدرالە، بەلکو چارە ب تنێ یا ل هەولێرێ. دڤێت حکومەتا هەرێمێ هندی بشێت هەیکەلێ خۆ بچیک بکەت و ئەو پلانا ب ناڤێ چاکسازیێ دانای بدەتە ڕێ و بن دیوار و دوو موچەیا و شەهیدێن بێ وارس و خانەنشینێن ئەوروپا و بریندارێن ساخلەم و شەهیدێن ناڤ ماڵێ موچێن وان ببرن و دراڤێ کو ژ سەرپێچیا و رسومات و باج و گومرک و فروکخانان و نەفتێ و کازێ دهێت کومڤەکەت و دابەشی سەر وەڵاتیێن خۆ بکەت، دا ب دروستی کارێ خکومەتێ بمەشیت و بزانن چارە ب تنێ یا د ماڵێ دا.