چیرۆکا مه‌ و ڤی دختۆرێ جامێر چه‌وا بوو هه‌کو دختۆرێ دوژمنی برینێن مه‌ ده‌رمان کرین؟رزگار کێستەیێ

رۆژا 12 گولانا 1988 مه‌ وه‌ک هێزێن لژنا ناڤچا شێخان یا پارتی دیمۆکراتی کوردستان بڕیاردا هێرشێ بکه‌ینه‌ سه‌ر بنگه‌هێن هێزێن ڕێژما به‌عس ل بابلۆ و بنگه‌هێن دۆروبه‌ران، ل باشوورێ زاویته‌ 5 کلم دووری سه‌نته‌رێ دهۆکێ. ژبه‌ر کو چه‌ک و چه‌بلخانه‌یه‌کا باش ل وان بنگه‌هێن دوژمنی هه‌بوو، کو هێزێن شوڕشێ وی ده‌می گه‌له‌ک پێدڤی ب چه‌ک و جه‌بلخانێ هه‌بوو.
ده‌مژمێر 4 ئێڤاری هێرشه‌کا بله‌ز ده‌ستپێکر بۆ سه‌ر بنگه‌هێن دوژمنی. هه‌روه‌سا ب چه‌کێ دۆشکایا 12،5ملم رێگری ل هێزێن دوژمنی هاته‌ کرن کو ژ دهۆکێ و که‌رتێ له‌شکه‌ری یێ زاویته‌ به‌ر ب جهێ شه‌ڕێ ڤه‌ بێن.
د ده‌مه‌کی کورت دا بنگه‌هێ سریێ لگه‌ل 6-7 بنگه‌هێن ( ره‌بیه‌ ) یێن دی هاتنه‌ پاقژکرن و 109 کلاشینکۆف لگه‌ل کۆمه‌کا چه‌کێن ناڤجی و ترۆمبیل و 57 دیل ژی ده‌ستکه‌فتێن پێشمه‌رگه‌ی بوون.
دڤێ چالاکیێ دا هه‌ڤالێ مه‌ یێ پێشمه‌رگه‌ سالح احمد سیاری شه‌هید بوو و ئه‌ز و شێخ عه‌لی گه‌لیێ رمانی، ئه‌مین گه‌ڤه‌ڕکی، حسنی کانیباسکا، شه‌هید سه‌فه‌ر سیاری و مه‌جید سۆری ژی بریندار بووین.
ب شه‌ڤ هه‌ڤالێن مه‌ ده‌ستکه‌فت و ته‌رمێ شه‌هیدی و بریندار ڤه‌گوهاستنه‌ گوندێ پێده‌، کو وی ده‌می هنده‌ک مالێن پێشمه‌رگا لێ هه‌بوون.
پڕانیا برینداران ژی برینێن وان دگران بوون، لێ تشتێ هه‌ری نه‌خوه‌ش ئه‌و بوو، کو مه‌ چ نووژدار نه‌بوون برینداران ده‌رمان بکه‌ن. کاک عدنان بێدهی ئه‌و چه‌ند رۆژه‌ک بوو چووبوو خۆله‌کا برین پێچیێ، لێ هێشتا د پراکتیکێ دا چ کارێ نووژداریێ نه‌کربوو و برینێن برینداران ژی گه‌له‌ک دگران بوون.
پاشی هنده‌ک پێشمه‌رگا گوتن دختۆره‌ک، کو هاریکارێ نووژداری یه‌، دناڤ دیلان دا هاتیه‌ گرتن. مه‌ داخواز ژێ کر کو وی ئازاد بکه‌ن و بینن بلا مه‌ ده‌رمان بکه‌ت. ڤێجا وه‌ره‌ دوژمنێ ته‌، ته‌ ده‌رمان که‌ت دێ چه‌وا بیت!!
کابرا ژی هات ڤێجا چ ژ نه‌زانین و چ ژی ژ دوژمناتی، هه‌ما کا برینێن مه‌ دچه‌وا بوون، ب وی گوشتێ سۆتی و وان موو و تشتاڤه‌ ده‌رێ برینا گرت و بانداژ دانانه‌ سه‌ر. دوو سێ رۆژ ده‌رباز بوون برینێن مه‌ ژ ناڤدا کول بوون و تژی کێم ئه‌داڤ بوون. ئێدی ره‌وشا مه‌ به‌ره‌ڤ خرابوون چوو. دڤی ده‌می دا هه‌ڤالان ئه‌م دڕێکا بێنارینکێ ڕاگه‌هاندبووینه‌ چه‌مێ عه‌مه‌ر ل وی گه‌لیێ رۆژهه‌لاتێ گوندێ بانیێ ل ناڤ مالێن بانیان.
وی ده‌می مه‌ چه‌ند نووژداره‌کێن شوڕشێ یێن گه‌له‌ک زیره‌ک هه‌بوون، ژ وان ژی د. که‌مال به‌رواری، د. محمد حسن بۆتی و د. هه‌ژار، کو هه‌رسێ ژی هاریکارێن نووژداران بوون، ژبلی کۆمه‌کا برنی پێچێن زیره‌ک، کو ل سه‌ر لق و لژنێن ده‌ڤه‌را به‌هدینان دبه‌لاڤ بوون. به‌س مخابن مه‌ ل شێخان که‌س نه‌بوو. ژ بلی کاک عدنان بێدهی و ئه‌کره‌م بیدهی کو هه‌ردوو ژی برینپێجێن نوو بوون.
ئێدی ب برووسک و نامه‌ و په‌یکا لگه‌ل لقێ و لژنێن دی ئه‌م که‌فیتنه‌ دووڤ نووژداران، کو ئێکی په‌یدا بکه‌ین بهێته‌ هه‌وارا مه‌. وی ده‌می ژی هاتنوو چوون هه‌موو ب پیا بوو و ژ لژنه‌یه‌کێ بۆ ئێکا دی جه‌ند رۆژه‌کان ڤه‌دکێشا. ژ ئه‌نجامێ پرس و دووڤچوونێ، مه‌ زانی کو دکتۆر هه‌ژار هاتیه‌ ده‌ڤه‌را شێخان ب هنده‌ک کاران. ئێدی مه‌ پێشمه‌رگه‌ راسپاردن کو ل وی بگه‌رن و وی په‌یدا بکه‌ن دا کو د تانا مه‌ بهێت. ئه‌و بوو وان دکتۆر هه‌ژار په‌یداکرن و ب هه‌وارکی هاته‌ هه‌وارا مه‌. لێ چ بهێت، ده‌ما هاتی سه‌وداسه‌ر بوو، کا چه‌وا بڤی ئاوای هه‌تا نوکه‌ ئه‌م نه‌مرینه‌. ئێدی وی ده‌ستێن خوه‌ لێ هه‌لکرن و ئه‌و برین ئێک ب ئێک ڤه‌کرن و ئه‌و کێم ئه‌داڤ هه‌می ژێ ده‌رێخستن و چه‌رم و گۆشتێ ڕزی و سۆتی هه‌می بڕین و هاڤێتن و ب ڕۆژان ئه‌و که‌ته‌ به‌ر ڤان برینان هه‌تا کو هه‌موو پاقژکرین و ئه‌م ژ مرنێ ڕزگارکرین. هه‌لبه‌ت دڤی هه‌موو کارێ وی د کاک عدنان بێدهی هاریکا ر و به‌رده‌ستێ وی بوو.
ژ هه‌ژی گۆتنێ یه‌ کو پشتی ره‌وشا من باشتر بووی و ئه‌ز ئینایمه‌ ده‌ڤه‌را به‌رواری بالا، هه‌ڤالێ منێ برینپێج.د. مه‌حمود هرۆری ژی گه‌له‌ک خزمه‌تا من کر.
هه‌لبه‌ت ئه‌و ژمارا کێما نووژدار و برینپێچێن شوڕشێ خزمه‌ته‌کا مه‌زنا پێشمه‌رگه‌ی و خه‌لکێ ده‌ڤه‌رێن رزگارکری کر. لێ تشتێ من دڤیا دڤێرێ دا ئاماژێ پێ بکه‌م ، ئه‌وه‌ کو دناڤ شوڕشێ دا ژ بێ نووژداری ئاها هۆسا ئه‌م نه‌چار دبووین کو دیلێن دوژمنی مه‌ ده‌رمان که‌ن، کو ئه‌و ژی دبوو ئه‌گه‌رێ هندێ، کو ل شوونا ساخکرنێ، مه‌ به‌ره‌ڤ مرنێ ڤه‌ ببه‌ن.
د. هه‌ژار کو دڤی وێنه‌ی دا لگه‌ل من دیاره‌، نوها ل هۆله‌ندا دژیت. هه‌لبه‌ت خزمه‌ت و فیداکاریا وی و نووژدارێن مه‌ یێن دی یێن شوڕشێ هیچ ناهێته‌ ژبیرکرن. ژ به‌هندێ ژی هه‌تا ئه‌ز مابم دێ سوپاسدارێ وی و هه‌موو وان نووژدارێن شوڕشێ یێن فیداکار بم.
شانازی بۆ خه‌باتا پاک….. رووڕه‌شی بۆ وان یێن لسه‌ر که‌د و خه‌باتا خه‌لکێ دی خوه‌ قه‌له‌و کرین.