فەرماندەیی ئۆپەراسیۆنە هاوبەشەكانی عێراق: دەست بە جێبەجێكردنی ڕێككەوتنی شنگال دەكەین

ئەمڕۆ چوارشەممە گوتەبێژ بە ناوی فەرماندەیی ئۆپەراسیۆنە هاوبەشەكانی عێراق بۆ (باسنیوز)ی دووپات كردەوە كە دەست بە جێبەجێكردنی ڕێككەوتنی شنگالی نێوان حكوومەتی هەرێمی كوردستان و حكوومەتی فیدراڵیی عێراق دەكەن.

لیوا تەحسین خەفاجی گوتەبێژ بە ناوی فەرماندەییەكە ئاماژەی بە سەردانی ئەمڕۆی شاندی ئاسایشی فیدراڵیی عێراق كرد بۆ نەینەوا، بە ئامانجی دەستپێكردنی جێبەجێكردنی ڕێككەوتنی ئاساییكردنەوەی دۆخی شنگال.

خەفاجی بە پەیامنێری (باسنیوز)ی راگەیاندووە كە سەردانی شاندە باڵاكە بۆ نەینەوا، بە ئامانجی جێبەجێكردنی ئەم ڕێككەوتنەیە كە بەم دواییە بۆ ئاساییكردنەوەی دۆخی شنگال ئیمزا كراوە.

گوتیشی هاتنی شاندە ئاسایشیە باڵاكە بۆ نەینەوا گرنگی خۆی هەیە و بۆ پشتیوانیە لە چارەسەركردنی كێشەكانی ئەم ناوچانە و هاریكاریكردنی گەڕانەوەی ئاوارەكانی شنگالە بۆ زێدی خۆیان.

پێشتر هەر یەک لە هەولێر و بەغدا، رێککەوتننە مێژووییەکەی شنگالیان سەبارەت بە ئاساییکردنەوەی دۆخی شنگال لە هەردوو بواری ئەمنی و ئیداریدا راگەیاند، کە دەبێتە هۆی ئاوەدانکردنەوەی شارەکە و گەڕانەوەی خەڵکە کۆچبەرەکەی و دەرکردنی تێکڕای گرووپ و هێزەکانی ناو شارەکە“.

ئەم سەردانەی شاندی ئەمنیی عێراقی بۆ مووسڵ، دوای سەردانی شاندێکی عێراقی هات بۆ هەولێر لە ناوەڕاستی هەفتەی رابردوو، بە سەرۆکایەتیی قاسم ئەلئەعرەجی، راوێژکاری ئاسایشی نەتەوەیی و کۆبوونەوەی لەگەڵ رێبەر ئەحمەد، وەزیری ناوەخۆ لە حکوومەتی هەرێمی کوردستان، بە ئامادەبوونی جینین بلاسخارت، نوێنەری نەتەوە یەکگرتووەکان لە عێراق و تیایدا باس لە هەنگاوەکانی دەستکردن بە جێبەجێکردنی رێککەوتننامەی شنگال کرا.

رێبەر ئەحمەد، وەزیری ناوخۆی حکوومەتی هەرێم، ئاماژەی بە رێککەوتننامەی نێوان هەردوو لا کرد بە دانانی خشتەیەکی زەمەنی، بۆ جێبەجێکردنی بڕگەکانی رێککەوتننامەکە لە لایەنی ئیداری و ئەمنی و سەربازی و دەستکردن بە ئاوەدانکردنەوەی شنگال لە نزیکترین کاتدا. هەروەها ئاماژەی بۆ ئەوەش کرد، قائمقامێکی نوێ بۆ قەزای شنگال دادەندرێ، جەختیشی کردەوە، خەڵکی رەسەنی شارەکە کاروبارەکانی شارەکە بەڕێوە دەبەن و هەر هێزێکی دەرەکی لە شارەکەدا بێ، پێویستە بچنە دەرەوە و هیچ شوێنیان لە ئایندەی شنگالدا نییە.

ئاماژەی بۆ ئەوەش کرد، نەتەوە یەکگرتووەکان چاودێریی جێبەجێکردنی بڕگەکانی رێککەوتننامەکە دەکەن. جەختیشی کردەوە، کە وەکو خۆی جێبەجێ دەکرێ.

لای خۆشیەوە قاسم ئەلئەعرەجی، راوێژکاری ئەنجومەنی ئاسایشی نەتەوەیی گوتی: ”دۆسێی شنگال گرنگ و هەستیارە“. ئاماژەی بۆ ئەوەش کرد، چەند هەنگاوێکی گرنگ لە م دۆسێیەدا بۆ ئاساییکردنەوەی دۆخەکە و گەڕانەوەی ژیانی هاووڵاتییان بۆ ناوچەکە و گەڕانەوەی کۆچبەران و بەڕێوەبردنی شارەکە لەلایەن رۆڵەکانی ئەو شارە، گیراونەتە بەر“. گوتیشی: ”هەموو ئەوانەی دەیانەوێ سەقامگیریی شنگال بشێوێنن، دوور دەخرێنەوە“.

هەروەها گوتی، جگە لە عێراقییەکان هیچ کەس و هێز و لایەنێکی دیکە لە شنگال نامێنێ، ئەوەی لەناو سنووری شنگالدا دەبێ هێزە عێراقییەکانن و ئەوان ئاسایشی ناوچەکە دابین دەکەن، لە لایەن هەرێمی کوردستانیشەوە هەماهەنگی و هاوکاریی دەکرێن بۆ جێبەجێکردنی رێککەوتننامەکە.