رێكا سحێلا بۆ زۆممار هات ڤه‌كرن 6 هه‌یڤ بۆ رێكا هه‌ردوو ده‌ڤه‌ران هاتبوو گرتن ڕۆژهات لوقمان
پشتی شه‌ش هه‌یڤان ژ گرتنا رێكا سه‌ره‌كی یا سحێلا بۆ ناحیا زۆممار، جاره‌ك دی ب فه‌رمی هاتنوچوون دناڤبه‌را هه‌ردوو ده‌ڤه‌ران ئاسایی بوویه ڤه.
ئه‌حمه‌د جه‌عفه‌ر گه‌رگه‌ری، رێڤه‌به‌رێ ناحیا زۆممار بۆ (باسنیوز) دیار كر: “ژ ئه‌گه‌رێ به‌لاڤبوونا په‌تایا كۆرۆنایێ، بۆ ده‌ما نێزیكی 6 هه‌یڤان، هاتن و چوون و رێكا سه‌ره‌كی یا دناڤبه‌را ناحیا زۆممار بۆ سحێلا هاتبو گرتن، لێ جاره‌ك دی ل فه‌رمی ئه‌و رێكه هات ڤه‌كرن و خه‌لك ب ئاسایی هاتن و چوونێ ئه‌نجام دده‌ن”.
رێڤه‌به‌رێ ناحیا زۆممار بۆ (باسنیوز) ئاماژه ب وێ چه‌ندێ ژی دا: “هه‌می رۆژان هاتنوچوون هه‌یه لێ ل ده‌مه‌ك دیار كری كۆ ل ده‌مژمێر 7:00 سپێدێ ده‌ست پێ دكه‌ت تا كۆ ده‌مژمێر 7:00 ئێڤاری و دویڤ وی ده‌میدا رێك دهێت گرتن و هه‌لبه‌ت ئه‌ڤه ژی هه‌ر ژ پێخه‌مه‌ت پاراستنا گیانێ خه‌لكێ هه‌ردوو ده‌ڤه‌رانه”.
ئه‌و چه‌نده ژی دۆپات كر: “ئه‌و كه‌سێن ب ره‌گه‌ز عه‌ره‌ب سه‌ره‌دانا ده‌ڤه‌رێ دكه‌ن بۆ ده‌ربازبوونێ دڤێت به‌لگه‌ناما ئاكنجیبوونێ دگه‌لدا بیت كۆ ل رێڤه‌به‌ریا ئاكنجیبوونا دهۆكێ دهێت درۆستكرن و ئه‌و كه‌سێن ژ پارێزگه‌ها دهۆكێ ژی قه‌ست دكه‌ن ب ره‌نگه‌كێ ئاسایی دشێن قه‌ست بكه‌ن ل وی ده‌مێ هاتیه دیاركرن”.
Leave A Comment