لە چلەی ماتەمینی ھاوڕێ و دەستەخوشکی زێدە ئازیز و خۆشەویستم (جیهان سندی)/لەنجە دزەیی

ئای چەندە بە ئازارە کە ٤٠ ڕۆژە گوێم لە دەنگە خۆشەکەت نەبووە و پێت نەگۆتیمە لەنجە گیان، هەر چەندی دەینم و دەبەم قەناعەت ناکەم کە لێم بزربووی بەیەکجاری و نات بینمەوە جیهان گیان!
قەت تەسەورم نەدەکرد ئەو ئاوێنە جوانەی تەمەنت وا بەئاسانی بکەوێتە بەر دەستی ئەجەل.
دەستە خوشکە بە ویقار و بەعیلم و روح سوکەکەمان بۆ یەک جاریش بی بگەڕێوە لامان، وەک سێبەر بێ یا وەک خەون تەنها یەک جار بگەڕێوە، تا پێت بڵێم بە خوا بە خوا زۆۆۆۆۆرت غەریبی دەکەم!
خۆ پیرە قەراتی هەولێرێش خەبەری لۆ ناردیمە دەڵێ بە جیهان سندی بڵێ غەریبی دەکەین!
هەر هەموومان بە هاوڕێ و خزم و دۆستان ئەوەی لۆ یەکجاریش ناوتی بیستبی یان ئەتوی دیتبی بە هەواڵی کۆچی دواییت تاساینە و لۆت خەمبارین، خاتونە سەلار و سەنگین و بەتوانا و کوردپەروەرەکەی کوردستان و سندیان، ڕاستە بە جەستە جێت هێشتین، بەڵام روحە جوان و پاکەکەت هەردەم زیندو دەمێنێ لە ناخمان و تا ئەبەد لەبیر ناکرێی.
ماڵئاوا ئازیز و خۆشەویست و قەدرگرانەکەی هەموومان، ماڵئاوا جیهانی جوان و روح فریشتە.
خوات لەگەڵ و دوا سەفەرت خێر و دوا مەنزلگات بەهەشتی بەرینە انشاءالله، خودایە ئامانەتی تۆبی.