ئەنفال تاوانەکا جڤاکی ، ژ پێخەمەت بەرژەوەندێن سیاسی غیاس خالد زێباری
بزاڤا رزگاریخوازیا کوردی ل باشوورێ کوردستانێ ، وەک بزاڤەکا نەتەوی و نشتیمانی ب رێکێن ئاشتیانە خەبات کریە بۆ زڤراندنا مافێ خەلکێ کوردستانێ ددەستێ داگیرکاران دا ، ئەگەر شۆرەشێن چەکداری ژی بەرپا کربن ژ نەچاری بوویە و ژ پێخەمەت ئاشتیا جڤاکی بوویە ، ھەروەکی بارزانی نەمر کەرەمکری ( ئەم شەری دکەین ژ پێخەمەت نەمانا شەری ) ، بەرامبەر ڤێ چەندێ حکومەتێن ئێک لدیف ئێکێن عیراقێ ھەمی ھەوڵ و شیانێن خۆ مەزاختن بۆ تێکدانا ئاشتیا جڤاکی و گۆڕینی دیموگرافیا کوردستانێ ، ھەر ل ھەوێن بەردەوام یێن عەرەبکرنا کوردستانێ ھەتا نھو ، تا دگەھیتە بکارینانا چەکێ کێمیاوی و وێرانکرنا زێدەتر ل چار ھزار و پێنج سەد گۆندێن کوردستانێ و بەرپاکرنا ھەوێن بەرفرەە یێن ئەنفالکرنا کوردستانێ کۆ بوویە ئەگەرێ بێ سەرۆ و شوونکرنا زێدەتر ل سەد و ھەشتێ و دوو ھزار وەلاتیێن کوردێن سڤیل کۆ پرانیا وان زاروک و ئافرەت بوون . راستە ئەڤ ھەوێن ئەنفالکرنا کوردا لسەر دەستێ رژێما ژناڤ چۆیا بەعس ل گەرمیان و ھەلەبچە ھەتا دگەھیتە بادینان تاوانەکا جینۆساید کرنا مللەتەکی و مەزنترین کریارا ھۆڤانە بوو لڤی سەردەمی کۆ بۆ دەمەکێ ھەرە درێژ ئاریشێن جڤاکی پاش خۆ ھێلان . چونکی چەندین خێزان ھەلوەشاندن و ژناڤ برن و زاروو بێ سەمیان و سەرپەرشت کرن و گۆند و باژارووک وێران کرن و بسەدان ھزار ئاوارە و دەربدەر کرن ، ئەوێن مایی ژی تۆشی نەساخیێن جڤاکی و دەروونی کرن و ھەتا نھۆ کۆ سیە و ئێک ساڵ بسەر ڤێ تاوانێ دەرباز بوونە ھێشتا کاریگەریا وێ مایە و چەندین ساڵێن دیتر ژی دێ ھەر مینیت . یا جھێ حیبەتیێ بێ دەنگیا جڤاکێ نیڤ دەولەتی بوو لسەر ڤێ تاوانا مەزنا جینۆسایدێ . چونکی ئەڤ ھەوا رژێما بەعسا ناڤچویا عیراقێ ژ بۆ ژناڤبرنا گەلێ کورد و بزاڤا رزگاریخوازیا کوردستانی ل باشوور . ئانکۆ ئەڤ تاوانا مەزن ژ پێخەمەت پاراستنا بەرژەوەندێن سیاسی بوو ، چونکی شۆرەشا کوردستانی ل باشوور بەرەڤە سەرکەفتنێ و بدەستڤەئینانا دەسکەفتێن نەتەوی و نشتیمانی دچوو و رژێما وی سەردەمی یا عیراقێ ژلایێ لەشکری شیانێن بەرەڤانیکرنێ بەرامبەر شۆرەشا کوردی نەما بوو ، لەوما پەنا برە بەر ڤێ کریارا دژی مرۆڤاتیێ . جھێ دلخۆشیێ ئەوە حکومەتا ھەرێما کوردستانێ ب سەرۆکاتیا نێچیرڤان بارزانی بەرنامە و پلانێن باش ھەنە بۆ خۆشکرنا ژین و ژیارا بەرکەفتیێن ئەنفالا و ڤەدیتنا گۆرێن ب کۆم ل باشوورێ عیراقێ و زڤراندنەڤا پاشمیێن وان . پەیاما جەنابێ سەرۆکێ حکومەتا ھەرێما کوردستانێ ب ھەلکەفتا ٣١ ساڵیا ھەوێن قرکرنا کوردان بناڤێ ئەنفال پەیامەکا دلخۆشکەرە و نیشانێ گرنگیدانا جەنابێ وی یە ب ماڵباتێن ئەنفالا و زیان پێکەفتیا و ڤەژاندنا دەڤەرێن ئەنفالکری ل سەرتاسەرێ ھەرێما کوردستانێ بێ جوداھی . ژ برینەکرنا قوربانیێن ئەنفالا و کەس و کارێن وان چەند پەیڤەک بوون د گۆتارا جەنابێ وی بڤێ ھەلکەفتێ ، لێ ڕامانەکا بەرفرەە ھەیە و نیشانێ دلسۆزی و خەمخۆریا جەنابێ وی یە بەرامبەر قوربانیا و ماڵباتێن مایی چ ژلایێ قورەبۆکرنێ یان ئاڤەدانیێ و ڤەژاندنا گۆند و دەڤەرێن وێرانکرنی ، ھەرچەندە لسالێن بووری لسەر دەستێ جەنابێ وی درێغی بۆ ماڵباتێن ئەنفالکریا نەکریە و د پەیاما جەنابێ وی دا دیار دبیت کۆ حکومەتا ھەرێما کوردستانێ پلانەکا تۆکمە و درێژ خایەن ھەیە بۆ نەھێلانا شوونوارێن ئەنفال و کیمیا بارانکرنێ و ناساندنا ڤێ تاوانێ وەک جینۆسایدا مللەتێ کورد لسەر ئاستێ نیڤ دەولەتی و کڤاشتن لسەر حکومەتا ناڤەندیا عیراقێ بۆ قەرەبۆکرنەڤا وان . ئەڤ گرنگیدانا سەرۆکێ حکومەتا ھەرێما کوردستانێ ب قوربانی و ماڵباتێن وان ، ئاسۆیێن گەش ل قوناغێن داھاتی و پاشەرۆژا کوردستانێ نیشا مە ددەت و دیار دبیت کۆ نێچیرڤان بارزانی سەرکردەکێ دلسۆز و خەمخۆرێ گەل و وەلاتێ خۆیە و بۆ ھەمی ڕەوش و دەم و کاودانا بەرنامە و پلانێن د بەرژەوەندا کورد و کوردستانێ ھەنە .